O Concello de Sarria xa ten pechada a axenda para as festas patronais de San Xoán, que terán lugar entre o 23 e o 27 de xuño. A programación destaca pola presenza de sete orquestas, concertos de bandas como The Rapants, Eoas e Mrs. Fine, animación nas rúas, un desfile de Pampónigas, un correfoc e actividades deseñadas para o público infantil, entre outros eventos.
Como novidade inclusiva, durante todos os días das festas haberá horas sen ruído nas atraccións, concretamente de 18:30 a 20:30. Esta medida busca facilitar o goce das atraccións a nenos e adultos con hipersensibilidade acústica, unha proposta que se mantén dende hai varios anos.
O programa arranca o martes 23 coa Noite do Lume. A partir das 20:00h, o desfile de Pampónigas e Dimonis de La Plana percorrerá a Rúa Maior. Seguiralle o pregón a cargo do astrofísico Borja Tosar, quen contará cun intérprete de lingua de signos, seguido do lanzamento do foguete inaugural e actuacións de diversas agrupacións locais. A noite continuará cunha pancetada popular e concertos de Eoas e o espectáculo de lume e danza do Correfoc Dimonis de La Plana. A verbena porana a orquestra Costa Dorada.
O mércores 24, día do patrón, haberá pasacalles da Banda de Música de Sarria, recepción de autoridades, misa maior na igrexa de San Salvador e procesión. Pola tarde, continuarán os pasacalles e haberá un concerto da Banda de Música de Sarria na Praza da Vila. A xornada rematará coas orquestas Los Satélites e París de Noia.
O xoves 25 estará dedicado á tarde infantil e á maxia. A Praza da Vila acollerá actividades como bailes, pintacaras e manualidades a cargo de Trémola Teatro, ademais dun espectáculo de maxia co mago Roberto Lolo. A verbena será amenizada polo Grupo Ráfaga e a orquestra New York.
O venres 26 dará comezo o torneo de fútbol sala San Xoán no pavillón José Mario González, que se estenderá ata o día 28. A tarde incluirá pasacalles e animación coa discoteca móbil Duendeneta no paseo do Malecón. A noite de verbena contará coas orquestas Trébol e Charleston Big Band.
O sábado 27 celebrarase o festival Vibra Xoán no Campo do Río. A xornada comezará con pasacalles e un concerto da Banda de Música da Comarca de Sarria. O festival traerá as actuacións de Mrs. Fine, a banda indie The Rapants e continuará coa festa a cargo de Duendeneta Dj.
Aínda que as festas rematan o día 27, o domingo 28 as atraccións permanecerán abertas con prezos especiais para os nenos e nenas. Ese mesmo día celebrarase a final do torneo de fútbol sala. Ademais, a sociedade cultural e recreativa La Unión organiza unha cea de gala e unha sesión vermú.
