O Concello de Teo e a Fundación ONCE, a través de Inserta Empleo, asinaron un convenio de colaboración co obxectivo de impulsar o emprego das persoas con discapacidade no municipio. A alcaldesa, Lucía Calvo de la Uz, e a directora de Marketing Social y Convenios de Fundación ONCE e directora de Área de Empresas, Alianzas, RSC-D de Inserta Empleo, Mar Medeiros, formalizaron este acordo que busca mellorar a inserción laboral e a accesibilidade universal.
A rexedora destacou que estas iniciativas benefician a inserción laboral, a accesibilidade universal e o codeseño de políticas sociais inclusivas, posicionando a Teo como unha administración comprometida coa Axenda 2030 e os Obxectivos de Desenvolvemento Sostible (ODS). Tamén sinalou que se mellora a cohesión social e se atende de forma prioritaria aos colectivos en situación de vulnerabilidade.
Pola súa banda, Mar Medeiros resaltou a importancia das alianzas entre administracións públicas e entidades especializadas para construír entornos máis inclusivos. "Con este convenio impulsaremos non só a incorporación das persoas con discapacidade ao mercado laboral, senón tamén iniciativas que favorezan a accesibilidade universal e a participación plena de todas as persoas na vida económica e social de Teo", engadiu.
O convenio, cofinanciado pola Unión Europea, establece un marco de colaboración para mellorar a situación laboral das persoas con discapacidade mediante programas de formación, captación, derivación, orientación e inserción. Un dos obxectivos é sensibilizar á cidadanía, axentes sociais e institucións sobre as capacidades das persoas con discapacidade, impulsando a súa incorporación no mercado laboral e concienciando ao tecido empresarial na aposta polo talento mozo.
Ademais, o acordo inclúe a colaboración co tecido asociativo de Teo para canalizar a prestación de servizos a persoas con discapacidade e accións de difusión para dar a coñecer as actuacións que se levan a cabo.
