A Xunta de Galicia pechou hoxe as Xornadas Europeas do Patrimonio, organizadas en Galicia, cun encontro de relatores no Museo das Peregrinacións e de Santiago. A xornada, orientada a profesionais e estudantes do ámbito patrimonial, centrouse na reflexión sobre os efectos do clima na arqueoloxía e na convivencia do patrimonio co urbanismo.
Ángel Miramontes, director xeral de Patrimonio Cultural, destacou a importancia de celebrar esta cita como mostra "do traballo e interese pola conservación patrimonial" en Galicia. Lembrou que o obxectivo das institucións europeas é "animar ás autoridades públicas e á cidadanía a valorar o patrimonio local e europeo, fomentando o diálogo intercultural".
A programación, que se desenvolveu durante setembro e outubro, incluíu tamén unha visita guiada ao xacemento de Adro Vello no Grove, unha actividade de descubrimento patrimonial para escolares en torno á muralla medieval de Santiago de Compostela e un obradoiro de revitalización do tecido tradicional galego no Museo do Pobo Galego.
Os relatorios da xornada de hoxe abrangueron o Proxecto Sentinela sobre procesos erosivos no patrimonio cultural das Illas Atlánticas de Galicia, o seguimento de xacementos arqueolóxicos costeiros expostos á erosión mariña, o impacto do aumento do nivel do mar no patrimonio subacuático e a análise do impacto dos incendios forestais na arte rupestre de Galicia.
