O consorcio, que reuniu universidades e entidades sociais de España, Irlanda e Italia, empregou a metodoloxía de Aprendizaxe-Servizo (ApS) para fomentar a aprendizaxe mutua, mellorar as competencias cívicas e romper estereotipos sociais, co obxectivo de construír unha identidade europea cohesionada.
A iniciativa desenvolveu cinco paquetes de traballo que incluíron formación especializada, un MOOC de acceso aberto en tres idiomas, 12 proxectos de ApS colaborativos para responder a necesidades de inclusión, e a elaboración de recursos clave como unha Guía de boas prácticas e un informe de análise de impacto. O proxecto tamén contribuíu aos Obxectivos de Desenvolvemento Sostible 4, 5, 10, 16 e 17.
Este é o quinto proxecto Erasmus+ coordinado pola USC desde 2014 en obter este selo de recoñecemento honorífico, que se outorga tras avaliar o informe final e a implementación do proxecto, e que distingue a iniciativas cunha calidade, innovación e impacto excepcionais.
Para recibir esta distinción, os proxectos deben cumprir criterios como obter unha alta puntuación na avaliación técnica, demostrar unha xestión excelente, crear metodoloxías transferibles e replicables, constatar cambios positivos na organización e na comunidade, e executar unha difusión eficaz dos resultados.
