A chegada da OCUSC a Lugo responde á vontade de favorecer unha maior vertebración da actividade cultural universitaria e contribuír ao desenvolvemento dunha identidade musical compartida. A iniciativa contempla a creación e o desenvolvemento progresivo de formacións corais e orquestrais no Campus de Lugo, integradas na estrutura xeral da OCUSC, pero cunha actividade propia e adaptada ás características da contorna luguesa.
O director da OCUSC, Mario Diz, explica que “Trátase dun paso moi importante no desenvolvemento dun proxecto musical universitario consolidado, que amplía o seu ámbito de actuación co propósito de ofrecer novas oportunidades de formación, participación e creación artística á comunidade luguesa”. O proxecto aspira a consolidar unha programación musical continuada, articulada arredor de ensaios, preparación de repertorios e participación en actividades e concertos, favorecendo o intercambio de experiencias entre os campus de Santiago e Lugo.
“"Unha das súas principais fortalezas reside precisamente na combinación da formación musical coa experiencia artística real, permitindo que as persoas participantes se integren nunha dinámica de traballo colectivo na que o proceso de aprendizaxe adquire tanta importancia como o resultado interpretativo."
Tras o inicio da actividade neste primeiro cuadrimestre, a Orquestra e Coro da USC puxo en marcha unha convocatoria extraordinaria de incorporación de participantes para ampliar progresivamente as formacións do Campus de Lugo. A campaña busca achegar a iniciativa tanto á comunidade universitaria como a outros espazos educativos e musicais da cidade, convidando a novas voces e instrumentistas a formar parte deste proxecto colectivo.
As persoas interesadas en incorporarse poden consultar a información relativa á convocatoria e formalizar a súa solicitude a través das canles da OCUSC ou do correo electrónico orquestraecoro@usc.gal. A posta en marcha das formacións en Lugo pretende tamén reforzar a conexión entre a Universidade e o tecido musical da cidade, establecendo novas posibilidades de colaboración cos centros de ensino musical, as institucións culturais e as persoas vinculadas á actividade artística da contorna.
Nesta primeira etapa, o proxecto conta coa participación de Baruk Domínguez Grandío na dirección do coro e de Manuel Fernández Gayol como director convidado da orquestra. A OCUSC constitúe un espazo de formación musical que combina o desenvolvemento das competencias artísticas e interpretativas coa adquisición de habilidades persoais e sociais, como o traballo en equipo, a responsabilidade compartida e a escoita.
