A campaña comeza o domingo 22 de novembro cunha andaina popular contra a violencia de xénero pola parroquia de Taboi. A saída será ás 11:00 h dende o Campo da festa de Taboi. O percorrido, de aproximadamente 5 km, combinará espazos naturais e patrimonio cultural. Ao remate, a concelleira de Servizos Sociais e Igualdade, Mª José Martínez Vigo, lerá o manifesto institucional.
Paralelamente, emitiranse cuñas de radio dende o día 21 e publicaranse anuncios en varios xornais como El Progreso, La Voz de Galicia e El Correo Gallego o mércores 25 de novembro. Tamén se repartirán gratuitamente bolsas reutilizables co lema da campaña: O RESPECTO É A BASE DE CALQUERA RELACIÓN, dispoñibles nas oficinas municipais, na Casa da Cultura e no Centro de Saúde dende o mércores 25.
A distribución destas bolsas conta coa colaboración de establecementos como SUPERMERCADO PETEIRA, FARMACIA FERNANDO PENAS Y MARTA PUENTE, C.B., PANADERÍA OUSÁ e FARMACIA CORTIZAS. Ademais, repartiranse a través de usuarios da Escola Infantil Municipal e do servizo de Conciliación Familiar.
Estas accións están financiadas polo Ministerio de Igualdade e polo propio Concello de Outeiro de Rei. O mércores 25 de novembro tamén se celebrará a charla PREVENCIÓN, DETECCIÓN E PAUTAS DE ACTUACIÓN EN CASOS DE VIOLENCIA DE XÉNERO, impartida por profesionais da Comandancia da Garda Civil de Lugo.
A charla terá lugar no salón de actos da Casa da Cultura de 16:30 h a 18:30 h e está aberta a calquera persoa interesada. O obxectivo é sensibilizar e concienciar á poboación para erradicar a violencia de xénero.
