A Real Filharmonía de Galicia (RFG) vén de pechar a convocatoria para unha nova edición do seu Obradoiro de Dirección Orquestral, que recibiu un total de 121 candidaturas procedentes de diferentes partes do mundo. Esta elevada participación subliña o interese que esperta esta iniciativa formativa, coa que a orquestra compostelá reafirma o seu compromiso co desenvolvemento profesional das novas xeracións de directores e directoras.
As persoas admitidas nesta edición son Jacobus De Jager (Sudáfrica), Nina Haug (Suíza), Kentaro Machida (Xapón), Adrian Rogers (Estados Unidos), Jorge Yagüe (España) e Chunyi Zhao (China). A convocatoria conta, ademais, cunha lista de agarda para cubrir posibles baixas.
O obradoiro desenvolverase do 7 ao 10 de decembro de 2026 no Auditorio de Galicia, en Santiago de Compostela, baixo a dirección de Baldur Brönnimann, director titular e artístico da RFG. Durante catro días, os participantes terán a oportunidade de afondar na súa formación a través da experiencia práctica cunha orquestra sinfónica profesional, desenvolvendo as súas habilidades e ampliando os seus recursos na dirección musical.
A iniciativa ofrece un espazo de aprendizaxe directa onde o contacto co conxunto instrumental e a orientación dun director experimentado son fundamentais. O traballo práctico permite ás persoas participantes achegarse ás dinámicas do ensaio orquestral, explorar ferramentas de dirección e adquirir unha experiencia valiosa para a súa evolución artística. Esta experiencia tamén fortalece os vínculos da orquestra con profesionais de distintas procedencias, enriquecendo a RFG con novas perspectivas artísticas.
Baixo o impulso artístico de Baldur Brönnimann, o obradoiro forma parte dunha aposta por manter viva a música sinfónica a través da aprendizaxe, a renovación e a apertura ás novas xeracións, contribuíndo á transmisión do coñecemento e á evolución da tradición sinfónica.
