As axudas distribúense en tres liñas de actuación: 125.000 euros para programas dirixidos a persoas con enfermidades neurodexenerativas (alzhéimer, demencias, párkinson), 75.000 euros para atención a persoas con dano cerebral e epilepsia, e 100.000 euros para persoas con enfermidades raras, linfedema, síndrome de Down e outras patoloxías crónicas graves.
A finalidade destas subvencións é contribuír a mellorar a autonomía das persoas con necesidades sociosanitarias especiais, paliar limitacións e favorecer a súa rehabilitación e integración. Os programas subvencionados inclúen intervencións de fisioterapia, logopedia, rehabilitación cognitiva, terapia ocupacional e apoio psicolóxico.
O prazo límite para que as entidades beneficiarias presenten a documentación xustificativa da realización dos programas remata o vindeiro 10 de novembro.
