O informe da Dirección Xeral de Saúde Pública da Consellería de Sanidade, correspondente á semana que rematou o 25 de outubro, sinala que a actividade gripal na comunidade galega mantén o seu nivel basal cunha tendencia crecente. Constátase un incremento na dispensación de antigripais nas farmacias galegas.
En concreto, a taxa de dispensación de antigripais nas farmacias aumentou un 38,9 % na última semana. Pola contra, a de probas de antíxenos reduciuse nun 17,9 %. Estes datos foron informados polas oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
Segundo recolle o informe do departamento sanitario galego, a taxa de consultas por gripe aumentou un 8,3 % respecto da semana anterior, situándose en 14,3 consultas por cada 100.000 habitantes. O aumento da taxa produciuse en todos os grupos de idade, agás no de 80 e máis anos, onde diminuíu un 37,8 %. O grupo de 0 a 4 anos foi o que rexistrou un maior incremento. A área sanitaria de Lugo foi a que presentou a maior taxa de consultas por gripe.
Respecto á COVID-19, a taxa de consultas mantívose estable, cun 21 % por 100.000 habitantes. Observouse un aumento da taxa nos grupos de 0 a 4 anos e de 5 a 19 anos, mentres que no resto diminuíu ou permaneceu estable. O grupo de maiores de 80 anos foi o que presentou un maior número de consultas, con 36,7 por cada 100.000 habitantes. A taxa de consultas por COVID aumentou unicamente nas áreas sanitarias da Coruña e Cee e na de Ferrol. A área con maior taxa foi a de Ourense con 30,8 consultas por 100.000 habitantes.
En canto aos ingresos hospitalarios con patóxeno confirmado, ata a semana do 25 de outubro notificáronse 132 ingresos por gripe (129 con virus do tipo A). A taxa de ingresos foi de 1,5 por 100.000 habitantes, lixeiramente superior á semana anterior. O grupo de idade con maior taxa de ingresos foi o de máis de 80 anos (8,1 por 100.000 habitantes), e a área sanitaria de Lugo, A Mariña e Monforte de Lemos rexistrou a maior taxa (4,9 por 100.000 habitantes), aínda que nesta área a taxa descendeu un 41,0 %.
A taxa de ingresos por COVID-19 descendeu de 5,9 a 3,9 por 100.000 habitantes. A taxa mantívose estable en case todos os grupos de idade, agás nos de 0 a 4 anos e de 5 a 19 anos. O grupo de maiores de 80 anos presentou a maior taxa de ingresos (20,4 por 100.000 habitantes). A taxa de ingresos por COVID descendeu en todas as áreas sanitarias, excepto na de Santiago. A área con maior taxa foi a de Ourense con 5,6 por 100.000 habitantes.
A positividade do virus da COVID-19 situouse no 15,6 %, o que supón un descenso respecto da semana anterior (17,7 %).
A Xunta de Galicia iniciou a campaña de vacinación nas residencias de maiores e centros de discapacidade o 28 de setembro. O plan de vacinación tamén inclúe a inmunización infantil nos centros de saúde e en 75 colexios integrados nun programa piloto, así como para o persoal sanitario, que comezaron o pasado martes 13 de outubro. Ademais, a semana pasada iniciouse a vacinación do grupo de persoas de 70 ou máis anos e do persoal dos servizos de emerxencias sanitarias.
