A conselleira de Vivenda e Planificación de Infraestruturas, María M. Allegue, xunto ao delegado territorial da Xunta en Pontevedra, Pablo Fernández, mantivo un encontro cunha decena de persoas beneficiarias destas axudas na cidade do Lérez. O Goberno galego convocou estas axudas en abril, cun financiamento integramente autonómico, e os asistentes recibiron achegas para a adquisición de vivendas protexidas no barrio de Valdecorvos.
En Galicia concedéronse un total de 129 axudas para a compra de vivenda protexida, das que 58 foron na provincia de Pontevedra. No caso das achegas para centros históricos, outorgáronse 59 na comunidade, 15 delas na provincia pontevedresa. No concello de Pontevedra, especificamente, concedéronse 29 axudas para vivenda protexida e 2 para centros históricos, sumando un total de 288.000 €.
A Xunta xa abonou os 2 millóns de euros das concesións destas dúas liñas. Agora, o crédito ampliarase noutros 2 millóns de euros para atender a demanda. Desta cantidade, 1,7 millóns destinarase á liña de compra de vivenda protexida e 280.000 € á de centros históricos. A ampliación farase efectiva neste mes de xullo e o prazo para solicitar estas axudas rematará o 15 de outubro.
Esta ampliación de crédito permitirá outorgar as axudas a 89 persoas que quedaron en lista de espera, sempre que cumpran os requisitos. Destas, 51 beneficiaranse no concello de Pontevedra.
Ademais de Pontevedra, A Coruña, Ferrol, Santiago de Compostela, Lugo, Ourense e Vigo son outros municipios de prezo máximo superior onde as axudas poden acadar ata 20.000 € para menores de 36 anos e 16.000 € para maiores desa idade. Noutros municipios galegos, as axudas son de ata 16.000 € e 12.000 €, respectivamente. Para vivendas en centros históricos, as achegas chegan a 10.800 €, incrementables ata 12.800 € para menores de 36 anos e ata 15.000 € en zonas declaradas como área Rexurbe.
A conselleira destacou o compromiso do Goberno galego para facilitar o acceso á vivenda, lembrando a compatibilidade destas achegas cos avais da Xunta para cubrir o 20% do aval hipotecario. Actualmente, no concello de Pontevedra, a Xunta ten en marcha 306 vivendas de promoción pública, a maioría en Valdecorvos.
