A alcaldesa de Lugo, Elena Candia, recibiu este sábado no Concello ao alcalde de Ferrol, José Manuel Rey Varela, nun encontro celebrado no marco das festas do San Froilán de Lugo. A xuntanza serviu para reforzar os vínculos entre ambas as urbes e explorar vías de cooperación.
Candia subliñou a importancia de que o irmandamento entre Lugo e Ferrol vaia máis aló dos actos institucionais, traducíndose en iniciativas conxuntas nos eidos turístico e cultural. "Queremos que este irmandamento nos permita compartir experiencias e dar unha maior proxección aos recursos culturais e patrimoniais que temos en ambos os municipios", sinalou a rexedora.
Nese obxectivo de fomentar a chegada de visitantes, a alcaldesa tamén puxo o foco na urxencia de mellorar as comunicacións ferroviarias. Candia incidiu en que unha mellor conexión é fundamental non só para dar a coñecer o patrimonio e a oferta cultural, senón tamén para o desenvolvemento económico e social. "Lugo e Ferrol teñen moito que ofrecer, pero necesitamos comunicacións que nos permitan estar mellor conectados", destacou.
A rexedora referiuse á situación da estación intermodal de Lugo, cuxa posta en funcionamento segue pendente sen data concreta de apertura, a pesar de que a súa inauguración estaba prevista para o pasado mes de xuño. "A estación intermodal espertou moita ilusión en Lugo. Seguimos as obras coa esperanza de que supuxesen un avance real nas nosas comunicacións, pero pasan os meses e seguimos no mesmo punto", manifestou, reclamando información clara sobre prazos e compromisos concretos.
Pola súa banda, o alcalde de Ferrol, José Manuel Rey Varela, destacou a vinculación histórica e a capacidade de ambas as cidades para contribuír ao progreso do norte de Galicia. "Ambas cidades están chamadas a vertebrar o avance do norte de Galicia, cada unha coa súa personalidade, a súa historia e a súa proxección", sinalou, lembrando que Ferrol conmemora este ano os 300 anos como Departamento Marítimo do Norte.
Rey Varela tamén fixo fincapé nos retos compartidos en materia de comunicacións e crecemento urbano. "Lugo e Ferrol compartimos retos e soños: a mellora das comunicacións territoriais e o crecemento das nosas cidades", manifestou, reivindicando melloras no transporte de viaxeiros e mercadorías e a necesidade dun tren que conecte ambas as urbes, ademais de avances para a estación intermodal ferrolá.
Ambos os rexedores saudaron os veciños presentes no acto, moitos deles procedentes de Ferrol. O encontro rematou coa invitación de Rey Varela a Candia para participar na celebración de San Xiao en Ferrol, e co intercambio de agasallos institucionais.
