A xornada comezará ás 11:00 horas co 54º Desfile do Traxe Galego na praza Maior, coa participación de Traxandaina e Cántigas e Frores. Paralelamente, o parque Rosalía de Castro acollerá o San Froilán Tecedeiro, unha mostra artesanal cun obradoiro de construción de pezas artísticas con materiais autóctonos.
A música tradicional soará desde as 11:30 horas coa XXVIII Mostra de Música Tradicional Galega, organizada pola Asociación de Gaiteir@s Galeg@s. Participarán grupos como Os Mecos de Ogrobe, Turoqua, Zanfoneiros da Tradescola, Lembranzas do Tambre, Arume de Boiro, Lubicáns, Xente Nova de Ferrol, Axeigo, Pandereteiros de Cántigas e Frores e Os Mersenarios, con actuacións pola mañá e pola tarde.
Ás 12:00 horas, no parque Rosalía de Castro, terá lugar a ofrenda floral a Rosalía de Castro, que realizará Sandra Piñeiro, presidenta da Audiencia Provincial de Lugo, acompañada polo coro de Cántigas e Frores. Esta homenaxe busca reforzar o vínculo coa lingua, a cultura e a identidade galegas.
A programación musical continuará ao mediodía coa Banda Xuvenil das Escolas Mancomunadas da Terra Chá (12:30h no patio do Edificio Administrativo do Concello), Claustro Música (13:00h no parque Rosalía de Castro) e Airiños de Orbazai (13:00h na praza de Santa María).
Pola tarde, a música tradicional seguirá coas actuacións de Bouba Pandeireteiras (18:30h na praza de Santa María) e Os Carunchos (20:00h no mesmo espazo), dentro da Mostra. Tamén haberá concerto de Uxía Lambona e a Banda Molona (18:30h no patio do Edificio Administrativo).
Outras propostas inclúen O Xogar de Breogán con Bico de Toupa (desde as 17:00h no patio do Edificio Administrativo), o Festivaliño Xacobeo On The Road no parque do Sagrado Corazón, e unha visita guiada ao cemiterio de San Froilán da man dos Pelúdez (17:30h).
A xornada completarase con concertos de David Prado (18:00h na Horta do Seminario), a asociación cultural Camiño Primitivo de Baleira (19:00h) e Os Pelúdez entre nós (19:30h na zona dos viños).
Xa pola noite, a praza de Santo Domingo acollerá o Electronic Lucus Fest (desde as 20:00h), a praza Maior celebrará a verbena coa Orquestra Suavecito (20:30h) e a Horta do Seminario recibirá o concerto de La Penúltima Sabinera (22:00h). A partir das 23:00h, a charanga Mekanika Rolling Band percorrerá varias rúas do centro.
