A Xunta de Galicia e as tres universidades públicas galegas, USC, UVigo e UDC, pecharon hoxe un acordo para reformar a estrutura de organización da Proba de Acceso á Universidade (PAU). O conselleiro de Educación, Ciencia, Universidades e FP, Román Rodríguez, destacou que o obxectivo é "procurar a maior coordinación para garantir que as probas sexan adecuadas ao nivel e contidos do currículo de Bacharelato e que se corrixan con criterios que reflictan a boa preparación do alumnado galego".
Rodríguez explicou que o novo deseño "vai dar máis seguridade ao alumnado, vai xerar máis igualdade, vai posibilitar unha maior implicación do profesorado de Secundaria e vai a delimitar as funcións, as responsabilidades e as características de todas as persoas que participan neste proceso". Engadiu que será "un novo modelo, máis seguro, máis coherente, máis igualitario e que faga posible evitar calquera tipo de controversia ou problema".
O titular do departamento educativo da Xunta tamén fixo fincapé na necesidade de ofrecer "as maiores garantías e certezas" ao estudantado e ás familias, aproveitando a oportunidade para mellorar o sistema. Sinalou que se "detectou unha debilidade, consensuouse e actuouse para dar unha solución a un marco que, funcionando ben, sempre tiña unha marxe de mellora".
Tras a proposta da nova orde reguladora polo Consello da Xunta e varias reunións de traballo, as universidades deron o seu visto e prace ao texto. O conselleiro agradeceu a disposición dos tres equipos reitorais a colaborar coa Xunta para responder á demanda de mellora do sistema de acceso á Universidade por parte de alumnos e familias.
Román Rodríguez lembrou que Galicia leva anos traballando por unha Proba de Acceso á Universidade "máis homoxénea, cun marco regulador claro e xusto para o alumnado galego, para favorecer a igualdade de oportunidades dos galegos con respecto ao resto dos estudantes do Estado".
Pola súa banda, os reitores da USC, Rosa M. Crujeiras, e da UVigo, Carmen García Mateo, e o reitor da UDC, Ricardo Cao, amosaron a súa satisfacción polo acordo, destacando que permite adecuar o sistema á lexislación e robustecelo.
O reitor da Universidade da Coruña, Ricardo Cao, subliñou o "traballo conxunto das tres universidades galegas" e que as achegas poñen á Comisión Interuniversitaria de Galicia (CiUG) nun papel central. Destacou que o diálogo coa Xunta resulta nunha orde "máis acaída" que ten en conta os cambios normativos e mantén "altos estándares" de acceso e admisión.
A reitora da USC, Rosa M. Crujeiras, salientou a participación "moi activa" das universidades a través da CiUG e do Tribunal Único, e que a orde regule tanto o acceso como o proceso de admisión, o que supón "un sistema con moitas máis garantías". Considera que a proposta "robustece un sistema que ten demostrado o seu bo funcionamento" e que a necesidade de actualización recolle melloras xa postas en marcha e outras novas, ademais da "necesaria corresponsabilidade" entre universidades e Administración.
A reitora da UVigo, Carmen García Mateo, cualificou a nova orde de "exemplo máis do traballo conxunto" e sinalou que axusta o sistema á lexislación estatal e mellora a realización das probas. Destacou as dúas comisións (Organizadora e Técnica) con funcións claras que dan "maior garantía de coordinación" e un bo equilibrio entre "custodia de altas garantías" e evitar erros, resultando nunha norma "mellor" froito do consenso.
A nova orde inclúe o proceso de acceso e admisión, adaptando a normativa galega ao Real Decreto 534/2024. Créase unha nova estrutura de coordinación institucional a través dunha Comisión Organizadora e unha Comisión Técnica.
A Comisión Organizadora estará conformada por tres representantes da Consellería, tres das universidades públicas e unha secretaría externa. Ocuparase das directrices xerais dos exames, criterios de redacción, avaliación e elaboración de guías de cualificación. Tamén elaborará bancos de materiais e establecerá mecanismos de supervisión por pares.
A Comisión Técnica será responsable das tarefas loxísticas e operativas, como horarios, lugares, medidas de seguridade e adaptación a necesidades específicas de apoio educativo. Estará conformada por dúas persoas de recoñecida experiencia a proposta da Xunta e polas persoas que ocupen a presidencia e a secretaría do Tribunal Único da CiUG.
No nivel de redacción, aplicación e corrección, os grupos de traballo terán maior presenza de docentes de Bacharelato (ata catro) xunto con docentes universitarios. Cada grupo estará dirixido preferentemente por un docente universitario, responsable da elaboración das propostas de exame e das súas guías de cualificación.
O proceso de admisión continuará xestionado pola Comisión Interuniversitaria de Galicia (CiUG), abarcando a solicitude de ingreso, oferta de prazas e asignación das mesmas.
