A Xunta de Galicia publicou no Portal de contratos Públicos de Galicia a licitación, cun importe de 507.386,88 euros, para o desenvolvemento dun sistema de xestión dinámica e automatización da demanda na atención primaria, puntos de atención continuada (PAC) e atención hospitalaria. O expediente ten un valor estimado de 2.180.505,60 euros, considerando posibles prórrogas por un período máximo de catro anos.
Esta iniciativa, aliñada coa operación “Transformación Dixital da Sanidade Galega” do Programa Galicia FEDER 2021-2027, busca impulsar a dixitalización do sistema sanitario. O obxectivo é mellorar a coordinación asistencial, optimizar procesos clínicos e administrativos, e favorecer unha atención máis eficiente, integrada e centrada no paciente.
As novas funcionalidades permitirán a xeración automática de citas, actuacións e seguimentos, así como a xestión proactiva da demanda médica. Isto reducirá as cargas administrativas e mellorará a experiencia de pacientes e profesionais, consolidando un modelo integrado de xestión asistencial.
A contratación tamén se enmarca na reforma integral da atención primaria impulsada pola Xunta, orientada a un modelo asistencial máis accesible e proactivo. Abordaranse novas capacidades de automatización de procesos, a xestión intelixente da demanda e a mellora da coordinación entre perfís profesionais.
O novo sistema integrará e evolucionará funcións existentes como a xestión de PAC, pacientes crónicos, interconsultas e axendas. As empresas interesadas teñen ata o vindeiro 26 de outubro para presentar as súas ofertas.
