A Consellería de Sanidade presentou ás organizacións sindicais un conxunto de medidas para actualizar o Decreto 226/1996, que regula o réxime retributivo do persoal de atención primaria. O obxectivo é que os cupos de maior complexidade e os postos asistenciais máis exixentes teñan un maior recoñecemento retributivo.
O novo modelo retributivo terá en conta, ademais do volume de poboación asignada, a idade dos pacientes e as condicións nas que se presta a asistencia. Unha tarxeta sanitaria dun menor de 0 a 2 anos ou dunha persoa de 81 ou máis anos terá un peso tres veces superior ao dunha tarxeta estándar, mentres que as correspondentes aos tramos de 3 a 6 anos e de 66 a 80 anos terán un peso dobre.
Tamén se contemplan compensacións económicas para os profesionais que traballan en municipios con menor poboación, tendo en conta a dispersión xeográfica, o factor de illamento e o factor de soidade. Estes factores aplícanse a médicos de familia, pediatras, enfermeiros e persoal de xestión e servizos.
Ademais, a Xunta incorporará a podoloxía á atención primaria, creando 14 prazas en 2027 e con previsión de ampliar ata as 28 no 2030. Ampliarase a rede de psicoloxía clínica a 50 profesionais ata 2030, e establécese unha ratio de 1/50.000 dietista-nutricionista, o que suporá 53 profesionais.
Cando se habilite unha nova praza de médico de familia ou de pediatra, seguirase a ratio de 1:1, polo que tamén se creará outra para enfermería. Estas medidas buscan mellorar as condicións laborais dos profesionais e a equidade asistencial.
