O equipo MICPROMOL do departamento de Microbioloxía da Facultade de Bioloxía da Universidade de Santiago de Compostela (USC), xunto co Grupo JJ Chicolino a través de JJ Chicolino e Egalsa, impulsa o proxecto ‘INMUBIVALV: Desenvolvemento dun sistema avanzado de acondicionamento e inmunoprotección para semente de moluscos bivalvos’. O obxectivo principal é desenvolver novas solucións tecnolóxicas que melloren a supervivencia da semente de moluscos bivalvos e faciliten a súa aplicación a nivel global.
Esta iniciativa combina a experiencia científica da USC coa capacidade do Grupo JJ Chicolino para aplicar os resultados da investigación no ámbito produtivo, co fin de mellorar a eficiencia e sustentabilidade da acuicultura. A investigación enmárcase no Plan IGAPE Industria Innova 2026, dentro do programa Galicia FEDER 2021-2027, que busca impulsar a investigación industrial, o desenvolvemento experimental e a innovación en procesos e organización.
A iniciativa de cooperación e transferencia tecnolóxica pretende dar un impulso ao cultivo de moluscos e ao marisqueo en Galicia, un sector que atravesa unha situación crítica desde hai unha década debido ao descenso na produción de distintas especies. INMUBIVALV representa unha aposta pola innovación e a colaboración entre empresa e universidade para contribuír á mellora produtiva, incorporando tamén obxectivos ambientais relacionados coa adaptación ao cambio climático, o uso sostible dos recursos naturais e a conservación da biodiversidade.
O equipo MICPROMOL da USC achega máis de vinte anos de experiencia na investigación sobre a saúde dos moluscos bivalvos, sumando coñecemento científico especializado á experiencia do Grupo JJ Chicolino para afrontar os retos da acuicultura.
