Persoal directivo e orientador de arredor de cincuenta centros educativos galegos de ensino medio participaron este luns en Santiago na reunión anual organizada polo Programa A Ponte entre o Ensino Medio e a USC. O encontro serviu para presentarlles o programa de actividades para o curso actual e as novidades da PAU de 2027. A xuntanza tamén se celebrará en Lugo, na Facultade de ADE, este mércores 30.
A reitora, Rosa Crujeiras, presidiu o acto, no que tamén interviron José María Alonso Meijide, delegado da reitora e representante da Universidade na CIUG, e Diana Fernández Méndez, delegada da reitora para asuntos de ensino medio e responsable do Programa A Ponte. Crujeiras destacou a importancia de que a Universidade se achegue aos centros educativos neste momento crucial para o alumnado.
O programa A Ponte, que se desenvolve dende o curso 2003-2004, ten como obxectivo difundir a oferta de estudos da USC entre o estudantado preuniversitario e orientar as súas preferencias académicas. Entre as súas actividades destacan as xornadas de portas abertas ‘Coñece a USC’, dirixidas a estudantes de 2º de Bacharelato e Ciclos Superiores de Formación Profesional, e charlas temáticas impartidas por profesorado da USC.
Este ano ofrécense un total de 185 charlas impartidas por 193 docentes de 45 departamentos diferentes. O curso pasado, estas actividades contaron coa participación de 21.527 estudantes. Ademais, o programa inclúe visitas aos centros de ensino medio de Galicia, nas que o pasado curso participaron máis de 7.800 estudantes en 146 visitas. Os Encontros do Ensino Medio na USC tamén ofrecen ao alumnado a oportunidade de contactar directamente coa Universidade, recibindo información in situ dos estudos.
