A delegada da Xunta en Ferrol, Martina Aneiros, xunto co alcalde de Cabanas, Fernando Couce, participou hoxe na primeira das catro rutas interpretativas polo litoral organizadas polo Concello de Cabanas. Estas travesías forman parte do proxecto ‘Cabanas: mar, natureza e sabores’, que conta co apoio da Consellería do Mar.
A iniciativa, que se desenvolve a bordo do barco ‘Anduriño’, busca explorar a riqueza ambiental, cultural e pesqueira da zona cun enfoque científico e de patrimonio mariñeiro. O programa inclúe catro rutas en barco este ano, ademais de percorridos a pé, e require inscrición previa na oficina de turismo.
O proxecto ‘Cabanas: mar natureza e sabores’ recibiu preto de 40.000 euros de achega autonómica para tres anualidades (2025, 2026 e 2027). O Concello de Cabanas, promotor da iniciativa, tamén programou eventos de cociña mariñeira, audioguías en varios idiomas e material impreso e pictogramas no Centro de Interpretación do Medio Mariño (CIMM) de Cabanas.
Martina Aneiros destacou as axudas para as Estratexias de Desenvolvemento Local Participativo (EDPL), cofinanciadas polo Fondo Europeo Marítimo de Pesca e Acuicultura (Fempa), cun orzamento de 10,3 M€ para 2026-2027. Estas axudas van dirixidas a entidades do sector pesqueiro, administracións públicas, asociacións, pemes e persoas físicas con domicilio fiscal en Galicia, coa finalidade de promover unha economía azul sostible nas zonas costeiras.
O Galp Golfo Ártabro Norte agrupa 38 entidades, incluíndo preto do 16% do sector pesqueiro, 26% do sector público, 42% do sector social e 13% do sector económico. Tamén integra a dez concellos da zona: Ares, Cabanas, Ferrol, Miño, Mugardos, Narón, Neda, Paderne e Pontedeume.
