A Estratexia Galega de Enfermidades Raras 2025-2030 pon os resultados en saúde como eixo transversal e inclúe unha liña específica para facilitar o acceso ás terapias farmacolóxicas. Así o destacou o director xeral de Integración e Innovación Asistencial do Servizo Galego de Saúde, Alfredo Silva, durante a inauguración do Foro Rexional de Enfermidades Raras, celebrado na Cidade da Cultura de Santiago.
O representante da Xunta sinalou que esta estratexia é a folla de ruta para avanzar na atención destas patoloxías, co obxectivo de mellorar os resultados en saúde, reforzar a atención integral e multidisciplinar, avanzar no diagnóstico, facilitar o acceso ás terapias e consolidar a investigación, a formación e a participación dos pacientes.
Galicia xa conta con avances consolidados como as unidades funcionais multidisciplinares de enfermidades raras, o Rexistro Galego de Enfermidades Raras ou o desenvolvemento do diagnóstico xenético. A estratexia tamén aposta por avaliar os resultados dos medicamentos orfos, potenciar a investigación e favorecer a participación en ensaios clínicos e terapias avanzadas.
Alfredo Silva subliñou a utilidade de encontros como este foro para poñer en común a visión da Administración, profesionais, pacientes e industria, co fin de que a innovación en medicamentos se traduza en mellores resultados en saúde e maior valor social.
