O presidente da Xunta, Alfonso Rueda, subliñou este mércores que as 147 bandeiras azuis coas que conta Galicia este ano, unha decena máis que no exercicio anterior, "ofrecen todas as garantías" e consolidan á comunidade como un referente internacional "de calidade, excelencia e sustentabilidade turística".

Durante o acto de entrega das distincións, celebrado en Xove e coa presenza da conselleira de Medio Ambiente e Cambio Climático, Ángeles Vázquez, o titular do Goberno autonómico recalcou que "para falar de Galicia Calidade fan falta exemplos visibles e recoñecibles como o son estas bandeiras", unha marca que xera confianza e valor, ao ser un símbolo recoñecido polos visitantes.

Rueda felicitou aos municipios galardoados e agradeceu o labor da Asociación de Educación Ambiental e do Consumidor (Adeac) por impulsar a Galicia a superarse ano tras ano, ao tempo que avogou por manter esa esixencia que "nos beneficia a todos".

Nesta edición, Galicia recibe 147 bandeiras azuis distribuídas en 118 praias, 11 portos e 18 centros. A estas distincións súmanse os 72 distintivos outorgados aos senderos azuis o pasado marzo, sumando un total de 219 recoñecementos. Galicia convértese así na comunidade que máis bandeiras azuis gaña e a segunda con máis distintivos de España, de tal modo que unha de cada cinco recoñecementos concedidos no país recae en territorio galego. Ademais, Sanxenxo e Vigo repiten como os dous municipios españois con máis areais galardoados.

Entre as novidades deste ano atópase a incorporación de catro novas praias que obtienen o distintivo por primeira vez: Niñóns (Ponteceso), O Laño (Poio), Pampaido (Sanxenxo) e a praia de Os Franceses (A Veiga), que se converte na primeira da provincia de Ourense en obter unha bandeira azul. Tamén se incorporan dous novos centros azuis: as sedes da Coruña e de Vigo do Instituto Español de Oceanografía.

Alfonso Rueda incidiu en que este liderado ten un mérito especial cando está a piques de cumprirse, o 1 de xullo, o primeiro aniversario desde que Galicia asumiu as competencias efectivas na xestión do seu litoral. Destacou que este será "o primeiro verán de xestión plena do noso litoral", para "ordena-lo, poñelo en valor, darlle un sentido, un relato, arranxalo onde faga falta e facelo accesible".

O presidente tamén sinalou o gran interese suscitado polo Camiño do Litoral, un proxecto que abrangue máis de 1.300 quilómetros en 53 etapas, e que demostra que "se facemos as cousas dende aquí e facémolas ben, sempre é mellor". "É a demostración", engadiu, "de que é perfectamente compatible manter en perfecto estado de revista os nosos tesouros naturais e permitir a vida económica", así como que "un litoral magnífico" conviva coas actividades tradicionais baixo "condicións moi estritas".