O Portal de Contratos da Xunta publicou a licitación, cun importe estimado de 589.146,12 euros, para a subministración e instalación de mobiliario de oficina destinado á ampliación do Edificio C do Hospital Clínico Universitario de Santiago de Compostela.
O expediente, que se divide en catro lotes e terá unha duración de dous anos, inclúe a posterior adxudicación dos contratos baseados que se formalicen. O primeiro lote abarca mesas e elementos para postos administrativos e de atención; o segundo, asentos e zonas de espera; o terceiro, material de almacenaxe; e o cuarto, accesorios e equipamento auxiliar.
As empresas interesadas teñen de prazo ata o 6 de outubro para presentar as súas ofertas.
Esta actuación forma parte dun investimento global de 5.700.960 euros da Xunta de Galicia para a dotación de equipamento electromédico, alta tecnoloxía e mobiliario clínico do novo Edificio C. O Plan de investimentos reafirma o compromiso da Xunta coa modernización tecnolóxica e a mellora da calidade asistencial do sistema sanitario público galego, coa previsión de que o novo edificio estea operativo este mesmo ano.
