A dirixente popular basea a súa demanda na decisión do xuíz instrutor, feita pública este luns, que mantén a imputación da concelleira e do propietario dunha atracción, por presuntos delitos de homicidio por imprudencia e lesións imprudentes. O maxistrado desestimou o recurso de reforma presentado pola concelleira, que solicitaba o arquivo da causa, así como o dunha acusación particular, seguindo o criterio da Fiscalía.
Para Luisa Sánchez, esta resolución xudicial reforza a responsabilidade política da concelleira e fai "inviable" a súa permanencia no goberno local. Subliñou que a edil tiña o deber de actuar para evitar o accidente e cuestionou que manteña o cargo a pesar da evolución do procedemento.
O auto xudicial aclara, non obstante, que o documento de incoación "non é nin un auto de procesamiento nin unha sentenza condenatoria", situando a causa nunha fase de instrución. O xuíz reafírmase en que Rodríguez Calviño, como responsable da concellería competente en materia de inspección e control de espectáculos públicos, "si ostentaba unha ‘aparente’ posición de garante". Segundo a resolución, a posible omisión investigada non se centra nun fallo técnico concreto, senón en non impedir o funcionamento dunha atracción "expresamente non autorizada" durante unhas festas xa en marcha.
O maxistrado engade que esa actuación permitira que a "fonte de risco" continuase operativa, "materializándose finalmente no resultado de morte". Ademais, o xuíz rexeita unha interpretación máis restritiva da defensa ao sinalar que "a defensa pretende reducir a fonte de risco ao parafuso que fallou", mentres que, ao seu xuízo, o risco xurídico relevante era máis amplo: unha atracción de feira funcionando sen autorización nin a documentación exixida para acreditar a súa seguridade.
“"Cal é a razón pola que <b>Abel Caballero</b> mantén no seu cargo a <b>Patricia Rodríguez</b>? Por que a segue protexendo?"
Neste contexto, Luisa Sánchez insistiu en que a situación procesual da concelleira esixe unha resposta política inmediata e reclamou a súa saída do cargo, ao considerar que a decisión xudicial "eleva o nivel de gravidade" do caso. O PP de Vigo criticou ademais a posición do alcalde e pediu explicacións sobre a continuidade da concelleira no Executivo municipal, así como sobre o cumprimento do código ético do Partido Socialista neste procedemento.
Finalmente, para a responsable popular "é revelador que ningún representante do PSOE aclarase se se está cumprindo o seu código ético ou non. Abel Caballero, Carmela Silva e a propia Patricia Rodríguez seguen calados 24 horas despois de que preguntásemos se a Executiva socialista foi informada dos delitos que se lle imputan á concelleira de Seguridade".
