O Concello de Boqueixón vén de abrir o prazo de presentación de solicitudes para as axudas económicas dirixidas a familias empadroadas no municipio. Estas subvencións, que ascenden a 400 euros por familia, buscan apoiar parcialmente os custos derivados do nacemento, acollida ou adopción de nenos e nenas.

A iniciativa, dotada cun orzamento inicial de 8.000 euros "ampliables se fose preciso", segundo sinalou o alcalde Ovidio Rodeiro, ten unha dobre finalidade: aliviar os gastos de crianza e, ao mesmo tempo, fomentar o tecido comercial local, xa que o importe da axuda deberá ser gastado integramente en establecementos radicados no municipio.

Os produtos que se poderán adquirir coa subvención inclúen pañais, lácteos e alimentos infantís, roupa, calzado, ajuar, produtos de hixiene, medicamentos ou calquera outro produto recetado por pediatría.

A achega económica será de 500 euros para aqueles nenos e nenas que acrediten unha discapacidade do 33% ou superior. As axudas outorgaranse por concorrencia non competitiva, sen ter en conta a renda familiar, para os nados, acollidos ou adoptados entre o 1 de xaneiro e o 31 de decembro de 2026.

Para poder solicitar estas axudas, as familias deben estar empadroadas en Boqueixón (incluído o menor) no momento da solicitude e comprometerse a manter o empadroamento durante un mínimo de tres anos. Tamén é requisito non ter pendente de xustificar outras subvencións municipais nin incorrer en prohibicións legais para percibir axudas.

As solicitudes poderán presentarse por vía electrónica a través da sede electrónica municipal ou de forma presencial no Rexistro Xeral do Concello.

Establécense dous prazos de presentación: o primeiro, para os nados, acollidos ou adoptados entre o 1 de xaneiro e o 13 de maio de 2026, será de 15 días naturais a partir do 14 de maio. O segundo prazo, para os nados, acollidos ou adoptados entre o 14 de maio e o 31 de decembro, será de 15 días naturais contados desde o día seguinte ao feito.