A convocatoria, que conta cun orzamento de 90.000 euros, contempla axudas de ata o 50 % dos gastos subvencionables, cun máximo de 10.000 euros por beneficiario. O gasto mínimo subvencionable establecido é de 1.000 euros.
Estas subvencións poderán destinarse a actuacións de adecuación dos locais, incluíndo reformas e habilitación de instalacións para mellorar a imaxe comercial, a adquisición de mobiliario expositivo de uso exclusivo, así como reparacións simples, decoracións e ornamentos que non modifiquen a estrutura construtiva. Tamén se subvencionarán os gastos para a substitución ou mellora da conservación dos rótulos comerciais.
Para poder acollerse a estas axudas, os establecementos deben estar situados no ámbito do Plan Especial de Protección e Rehabilitación da Cidade Histórica e instalados en edificios con máis de dez anos de antigüidade, ademais de cumprir co planeamento vixente. Poderán solicitalas persoas autónomas, pequenas e medianas empresas, cooperativas, sociedades civís, comunidades de bens e outras unidades económicas sen personalidade xurídica que desenvolvan unha actividade comercial ou de servizos aberta ao público.
Como é habitual, os interesados poderán solicitar unha visita técnica de asesoramento por parte do persoal da Oficina Técnica do Consorcio sobre as posibilidades de mellora do establecemento e dos seus rótulos.
Os locais comerciais son unha parte esencial da vitalidade da Cidade Histórica, contribuíndo á actividade das rúas e prazas, á creación de emprego e á configuración dun comercio de proximidade. A convocatoria pretende manter e mellorar estes establecementos, sumándose ao obxectivo de coidar e pór en valor este espazo.
