As catro cubertas do recinto xa foron colocadas e actualmente estanse a levar a cabo os traballos de acondicionamento do espazo para a posterior instalación dos elementos de xogo. Este proxecto, que forma parte do plan do Goberno de Inés Rey para a ampliación e mellora da rede de áreas infantís, é o primeiro dos catro parques destas características que o Concello ten o obxectivo de completar.
O concelleiro de Infraestruturas, Jesús Celemín, destacou que a estrutura "é pioneira na cidade e ofrece aos nenos e nenas a posibilidade de xogar protexidos tanto da choiva como do sol". Engadiu que se busca "a modernización xeral das áreas infantís, e iso pasa tamén por apostar en melloras na seguridade e pensar nos modelos de parque do mañá".
A intervención forma parte do Plan de Barrios 2025-2027, impulsado polo Goberno de Inés Rey, que xa mobilizou máis de 90 millóns de euros en investimentos para modernizar os espazos públicos da cidade.
A ampliación permitirá que o parque pase dos 400 metros cadrados actuais aos 730, incrementando a súa capacidade de 76 a 135 persoas. Ademais da cuberta, renovarase o pavimento e os elementos de xogo, incorporando equipamentos inclusivos e sensoriais, así como dous grandes tobogáns no noiro lindeiro.
Desde o ano 2021, o Concello realizou máis dun cento de actuacións en áreas infantís, como o novo espazo na praza de Portugal (con 1,3 millóns de euros), a remodelación da área infantil da praza de Pontevedra (máis de 374.000 euros) ou a renovación da área infantil de Busto, en Palavea (150.000 euros).
