O Concello de Ames activou un plan de emerxencia ante a grave situación de seca que afecta ao municipio. A tubaxe de captación de auga atópase xa 12 centímetros ao descuberto, un nivel que supera incluso o rexistrado no ano 2017, considerado ata agora o peor episodio de escaseza hídrica na zona.
A falta de choivas e as altas temperaturas agravaron a situación, levando ao Concello a endurecer as medidas xa existentes. Tras a declaración de prealerta por seca por parte da Xunta, prohibíronse o uso de fontes públicas, o rego de parques e xardíns, o enchido de piscinas e o baldeo de rúas e fachadas.
“"Non queremos chegar á situación de ter que facer cortes de auga temporais"
O obxectivo principal destas medidas é reducir o consumo ao máximo e garantir o subministro de auga potable á cidadanía. O dato máis preocupante é o estado da captación, onde parte do diámetro da tubaxe non está cuberto por auga. O alcalde, Blas García, advertiu de que se o nivel segue baixando, a captación podería verse comprometida.
Para adiantarse ao problema, o Concello estuda a instalación de bombas para captar auga a maior profundidade e prepárase para contratar camións cisterna de forma preventiva. Ademais, crearase unha Comisión da Sequía, liderada polo alcalde e con participación de técnicos, oposición e veciños, para facer seguimento e coordinar medidas.
Ames tamén está a coordinar actuacións con municipios veciños como Brión e Santiago de Compostela, cos que comparte infraestruturas de tratamento e captación de auga. Paralelamente, o Concello reclama á Xunta a reparación urxente dunha fuga na presa de Ponte Maceira, que provoca unha perda constante de caudal.
A administración municipal defende a adopción temperá destas restricións como medidas de responsabilidade para evitar cortes drásticos no subministro domiciliario. O Concello tamén puxo en marcha un sistema de control de grandes consumos para fomentar o aforro e concienciar aos veciños sobre a importancia de non malgastar auga.
