As familias numerosas galegas xa poden dispoñer do certificado oficial do seu título en formato dixital, descargándoo de xeito totalmente gratuíto desde a aplicación Xunta.eu. Esta nova funcionalidade busca reducir a carga burocrática e axilizar os trámites administrativos.
A medida responde ás demandas das propias familias, que en ocasións precisan dunha copia oficial do seu título para realizar diversos trámites ante outras administracións ou entidades. Ata o de agora, as familias xa contaban co título en formato tarxeta e dixital, e agora poderán telo tamén nos seus dispositivos móbiles en formato papel, coa mesma validez.
Na actualidade, máis de 32.700 familias en Galicia dispoñen do título oficial de familia numerosa. O Goberno galego tamén apoia a estas familias a través de beneficios fiscais e axudas económicas, ademais de ampliar a vixencia do título ata que o fillo maior cumpra os 26 anos de idade.
