Os albergues xuvenís Virxe do Loreto, en Porto do Son, e Espiñeira, en Boiro, foron obxecto de importantes melloras e dotáronse de novos equipamentos para a campaña de verán que comeza este mércores 1 de xullo. Estas actuacións, cun investimento total de máis de 150.000 euros, buscan ofrecer instalacións máis seguras e adaptadas ás necesidades dos participantes.
No albergue Virxe do Loreto realizáronse traballos de pintado de fachadas, fontanaría, poda e tala de vexetación, ademais de reparacións en tendas de campaña e substitución de lúas. Tamén se adquiriron novos equipamentos como lonas, fundas para colchonetas, estores, mobiliario renovado (camas, liteiras, sofá) e equipamento de cociña industrial (batidora, abrelatas), xunto cun altavoz portátil. Este albergue acollerá o campamento 'Natureza xunto ao mar' con 480 prazas e tamén se cederán usos a entidades xuvenís.
No campamento de Espiñeira, as melloras centráronse no acondicionamento integral da instalación eléctrica, nova iluminación na pista deportiva, instalación de toldos verticais no porche do comedor, adecuación da entrada, limpeza de camiños e tellados, pintado de reixas e actuacións de pintura interior. Renováronse tendas de campaña, fundas para colchonetas e mobiliario, e incorporouse equipamento de cociña e lavandería, ademais de papeleiras exteriores e un novo cartel. Este campamento acollerá as actividades 'Candilexas' e 'Talentia', ofertando un total de 618 prazas.
En conxunto, ambas as instalacións ofertarán preto de 1.218 prazas para nenos e mozos entre 9 e 17 anos, dentro da campaña 'Modo verán activo' da Xunta de Galicia. Na comarca do Barbanza, esta campaña suma 1.288 prazas en total, incluíndo minicampamentos, campos de voluntariado e cesións a entidades xuvenís.
A nivel galego, a campaña 'Modo verán activo' alcanza este ano 11.932 prazas, a cifra máis alta da súa historia, cun investimento de 5,5 millóns de euros. Na provincia da Coruña ofertaranse 3.745 prazas. A Xunta destacou o carácter integrador e inclusivo da programación estival.
