O Concello de Pontevedra puxo en marcha os preparativos para as festas estivais coa licitación da pirotecnia, cun contrato valorado en 104.181 euros. Esta partida divídese en tres lotes principais para cubrir as necesidades de son e luz ao longo da tempada.

O primeiro lote, cun orzamento de 8.591 euros, está destinado á adquisición de fogos de ruído para toda a campaña de verán. O segundo lote, dotado con 47.795 euros, cubrirá os espectáculos pirotécnicos das Festas do Santiaguiño e a apertura das Festas da Peregrina. Finalmente, o terceiro lote, tamén con 47.795 euros, financiará os fogos de luz para as celebracións de San Roque e o peche da Semana Grande pontevedresa.

As empresas interesadas terán de prazo ata o próximo 5 de xuño para presentar as súas ofertas. Unha vez finalizado este prazo, os técnicos municipais avalarán as propostas e procederán á adxudicación do contrato. As bases da licitación lembran que o obxectivo desta contratación é "ensalzar" os festexos, nos que a pirotecnia ten "tradicionalmente un lugar de gran importancia, sendo fundamental para crear un ambiente festivo acorde á celebración".

Esta non é a única iniciativa do Concello de cara ás festas. Recentemente, a Administración local xa adxudicou a montaxe eléctrica para o subministro das atraccións de feira, cun custo superior aos 160.000 euros, á empresa Setga. Ademais, a inspección de seguridade destes elementos, que será plurianual por primeira vez, será asumida por Aucatel, unha compañía con sede en Mataró.