A iniciativa, denominada Pontia, busca dotar ao tecido comercial da cidade das ferramentas necesarias para afrontar a era dixital. O programa centrarase en axudar aos negocios a utilizar de forma eficaz as ferramentas de intelixencia artificial (IA) e, ao mesmo tempo, reforzar a súa seguridade dixital mediante plans personalizados.
Segundo explicaron as expertas Mariem Filgueira e Judit Meiriño, impulsoras do proxecto co apoio do Concello, a IA e a ciberseguridade xa non son unha moda senón unha necesidade urxente para os comercios. Pontia ofrecerá un "salvavidas" aos comerciantes, brindando solucións prácticas ante posibles "ataques" en Internet e respondendo a preguntas como "O día que me ataquen, que fago? a quen chamo?".
O programa estrutúrase en tres eixos baixo o lema "Intelixencia que protexe; tecnoloxía que impulsa". A primeira fase inclúe a difusión a través de redes sociais e accións na rúa, cun prazo de inscrición aberto ata o próximo 6 de xullo a través do formulario pontia.gal ou do correo comunicacion@pontia.gal.
A segunda fase consistirá en charlas e encontros. A primeira sesión será o 25 de xuño na sede de Aempe, a segunda o 2 de xullo no Centro Leste coa Asociación de Comerciantes da Parda, e a última o 24 de xullo na Casa da Luz, que servirá como un 'open day' para balance e creación de redes entre os participantes.
Finalmente, a última parte de Pontia implicará a selección dos dez negocios que recibirán unha auditoría tecnolóxica completa e axuda para aplicar a IA en casos reais, ademais do deseño dun plan de acción contra ciberataques.
A concelleira de Promoción Económica, Anabel Gulías, subliñou a importancia destas iniciativas, que actúan como "ponte entre o tecido produtivo local e o océano inmenso da tecnoloxía e da intelixencia artificial. Tamén da seguridade".
