A concelleira de Turismo, Rocío Cochón, presentou o balance mensual, destacando que a taxa de ocupación medrou 3,59 puntos respecto a agosto de 2025, acadándose nun momento coa maior oferta aloxativa histórica do municipio (4.943 prazas). Estes datos confirman o «estado de graza» do turismo local e consolidan Poio como un destino de referencia.
As oficinas municipais de información turística atenderon a 4.501 usuarios en agosto, a metade deles na oficina temporal da Festa do Mar, con notable incremento de visitantes internacionais. O Porto Deportivo de Combarro mantivo o seu liderado provincial nos tránsitos, rexistrando 125 embarcacións de 11 países. Ademais, 1.733 peregrinos selaron as súas credenciais nas variantes xacobeas que atravesan Poio, a metade deles estranxeiros de máis de 40 países.
Cochón subliñou que os resultados extraordinarios estendéronse a todo o concello, felicitando en especial a Raxó, onde a ocupación chegou ao 97%. Destacou o papel de Apartamentos Xulia, establecemento histórico que contribuíu ao desenvolvemento turístico de Raxó.
A edil agradeceu o esforzo dos profesionais do sector e destacou que os bos datos de xullo e agosto, xunto coas previsións para os próximos meses, son a base para impulsar a desestacionalización, a internacionalización e a diversificación turística.
O Concello traballa para manter os bos resultados durante todo o ano, cunha programación que pon en valor o potencial turístico patrimonial, gastronómico, natural, deportivo e xacobeo. Próximas citas inclúen a 38ª Festa da Ameixa de Campelo e un congreso da Academia Xacobea no Mosteiro de Poio.
