A Consellería do Medio Rural, a través da Axencia Galega da Calidade Alimentaria, amplía a súa colaboración con Cáritas Diocesana de Santiago para impulsar a formación de persoas en risco de exclusión social. O director da Axencia, Martín Alemparte, asistiu hoxe ao desenvolvemento dunha nova acción formativa no Centro de Formación e Experimentación Agroforestal (CFEA) de Lourizán, en Pontevedra.
Esta iniciativa, que xa tivo unha primeira experiencia positiva no CFEA de Guísamo, confirma a boa evolución da colaboración e abre a porta á súa extensión progresiva ao conxunto da rede de Centros de Formación e Experimentación Agroforestal de Galicia. O obxectivo é mellorar a capacitación e favorecer a inserción laboral dos participantes.
O alumnado recibe un total de 80 horas de formación teórica e práctica. O curso céntrase no mantemento de xardíns e zonas verdes, incluíndo o manexo de rozadoira e outra maquinaria de xardinaría. Ademais, complétase coa formación necesaria para a obtención do carné básico de aplicador de produtos fitosanitarios.
“"A formación é unha das ferramentas máis eficaces para crear oportunidades, favorecer a autonomía das persoas e facilitar a súa integración laboral. Cando se unen os recursos da Administración e o compromiso das entidades sociais é posible desenvolver proxectos útiles que melloran a vida das persoas."
Alemparte destacou tamén o potencial da rede de CFEA como un recurso público ao servizo da sociedade, capaz de contribuír a retos sociais máis aló da formación agraria tradicional. Sinalou que estes centros poden poñer o seu coñecemento, instalacións e persoal ao servizo das persoas que máis o precisan.
A Consellería do Medio Rural amosou a súa vontade de seguir impulsando accións formativas similares noutros CFEA para ampliar as oportunidades de capacitación e inserción laboral de persoas en situación de vulnerabilidade, consolidando así a rede pública de formación agraria como unha ferramenta de inclusión social e desenvolvemento territorial.
