A actuación, que abarca 2,5 quilómetros de lonxitude, céntrase na execución dunha senda peonil de 2,5 metros de ancho, na creación de zonas de convivencia, no soterramento das instalacións e na mellora da drenaxe e do firme. As obras, que comezaron coa topografía hai dúas semanas, prevén estar rematadas a finais de abril do 2027.
Os traballos de mellora da drenaxe en zonas propensas a inundacións iniciáronse a pasada semana, co obxectivo de adiantar o máximo posible a intervención antes da tempada de choivas. En dúas semanas está previsto comezar a preparación do terreo para a colocación de instalacións na zona da senda.
O obxectivo principal desta intervención é mellorar a seguridade viaria, xa que a estrada actual carece de beiravías e espazos seguros para os peóns. A nova senda peonil, protexida do tráfico rodado, fomentará a mobilidade urbana sostible e hábitos de vida máis saudables. Ademais, crearanse plataformas elevadas en dous tramos para zonas de convivencia peonil e rodada, pavimentadas con formigón coloreado.
A vía contará cun novo firme, cuneta de formigón para drenaxe, muros de contención e varanda de aceiro en tramos con desniveis perigosos. Tamén se canalizará o alumeado público, acondicionaranse as interseccións e instalarase nova sinalización horizontal e vertical, cunha limitación de velocidade a 30 km/h para aumentar a seguridade e favorecer unha economía baixa en carbono.
