A concelleira de Comercio, Marta Saiz, explicou que o evento se desenvolverá na Praza de Abastos de Ribadeo, un espazo clave para a actividade económica local. A programación combinará foros de debate, actividades formativas, música e dinamización do mercado.
A xornada do sábado 19 de setembro estará dedicada a mesas redondas e á participación de especialistas para dar a coñecer as posibilidades da economía social como modelo de desenvolvemento, xeración de emprego e dinamización territorial. Tamén se buscará visibilizar modelos empresariais baseados na cooperación e o retorno social.
O domingo 20 de setembro, as actividades trasladaranse ao Mercado dos Domingos, integrando dinamización e música para conectar a economía social coa vida comercial e social de Ribadeo. O obxectivo é que o Foro sexa un punto de encontro para reflexionar sobre novas formas de producir, traballar e emprender de maneira colaborativa e sostible.
Esta iniciativa forma parte das actuacións do Concello de Ribadeo no marco da Rede Eusumo, co apoio da Xunta de Galicia, o Ministerio de Traballo e Economía Social e o SEPE, para promover o cooperativismo e a economía social.
As persoas interesadas en participar poden inscribirse a través da plataforma habilitada. Marta Saiz anima a empresas, emprendedores, entidades sociais e á cidadanía en xeral a sumarse a esta proposta para dinamizar a economía local.
