Os feitos tiveron lugar na Avenida de Vigo o pasado sábado, 6 de xuño, sobre as 18:30 horas. Unha patrulla acudiu tras o aviso dunha testemuña que viu como un vehículo impactaba contra o peche dunha finca e un poste de telefonía e luz. O condutor, tras a colisión, abandonou o coche e fuxiu a pé.

Pouco despois, outra testemuña alertou de que o mesmo suxeito estaba a fuxir a gran velocidade noutro turismo desde a zona do aparcadoiro do Lidl. Os axentes iniciaron unha persecución, pero o condutor ignorou as ordes de detención. A súa condución temeraria obrigou a outros vehículos e peóns a apartarse, polo que a patrulla decidiu abortar o seguimento directo para evitar un maior risco para a seguridade viaria e optou por peinar a cidade.

O vehículo utilizado na fuxida carecía de seguro obrigatorio e tiña a ITV caducada, polo que foi retirado e inmobilizado no depósito municipal.

Posteriormente, a Policía recibiu un novo aviso informando de que o turismo implicado na fuxida chocara contra un autobús na estación de Pontevedra, quedando bloqueado nunha dársena. Ademais, unha veciña alertou de que dúas persoas accederan á súa propiedade.

O dispositivo de procura localizou finalmente ao home xunto á muller que o acompañaba. A parella intentou fuxir de novo, pero foron interceptados. Durante o arresto do home, a muller mostrouse agresiva, gritando e empurrando a un axente, o que levou á súa propia detención por resistencia activa.

No cacheo á muller, interviñéronlle substancias estupefacientes presuntamente compatibles con marihuana e haxix.

O home enfróntase a cargos por condución temeraria, un delito contra a seguridade viaria por conducir sen permiso vixente, e desobediencia grave e resistencia aos axentes, delitos que tamén se lle imputan á muller.

Ademais da vía penal, o condutor foi denunciado administrativamente por dar positivo en drogas, non acreditar documentación, falsear a súa identidade e negarse a identificarse.