O estado fitosanitario da uva preséntase excelente, segundo as revisións realizadas por Areeiro, dependente da Deputación. Non obstante, observáronse síntomas de mildio larvado en acios, especialmente nas viñas con maior frondosidade. Por iso, recoméndase a realización de intervencións fitosanitarias con equipos revisados e calibrados, así como unha xestión axeitada da vexetación para facilitar a chegada dos produtos aos acios, continuando cos labores de esfollado nas vides máis frondosas.
Ademais, Areeiro fai fincapé na importancia de controlar a vexetación do chan para favorecer a ventilación dos acios e previr o oídio. Advírtese tamén de que as previsións meteorolóxicas incrementan o risco de aparición de botrite, especialmente a medida que os grans acumulan azucres.
En canto ao Scaphoideus titanus, vector da flavescencia dourada, aconséllase aplicar os tratamentos insecticidas obrigatorios nas zonas demarcadas e recomendados nas limítrofes. Sublíñase a necesidade de intensificar as intervencións en lugares con altas poboacións deste insecto, sobre todo en viñas abandonadas sen tratar, as cales deben ser eliminadas para previr a dispersión da enfermidade.
Tamén se detectaron trips, que neste momento causan danos estéticos, e síntomas de acariose con incidencia pequena na uva en maduración, salvo casos extremos onde se podería intervir con xofre.
Respecto á nogueira, continúa o voo da mosca da casca verde, cuxas larvas provocan podremia. Para o seu control, recoméndanse trampas de feromonas e a eliminación dos froitos caídos. Tamén se observa un incremento na bolboreta do buxo, polo que se aconsella aumentar a vixilancia e tratar se a defoliación o fai necesario.
