Ambos os textos, que forman parte do Plan Normativo do Concello para 2026, xa se poden consultar no portal de transparencia municipal. A cidadanía ten ata o vindeiro 22 de setembro para presentar alegacións e aportacións.
Este trámite, enmarcado na Lei 39/2015, busca recoller suxestións de persoas particulares, organizacións e asociacións representativas para mellorar os textos normativos.
O Regulamento de Espectáculos Públicos e Actividades Recreativas busca dar resposta á falta dunha normativa propia no municipio, establecendo requisitos administrativos, técnicos e de seguridade para a organización deste tipo de eventos.
Pola súa banda, o Regulamento de Réxime Interior das Instalacións Deportivas actualizará a normativa vixente de 1997, incorporando novas instalacións e regulando aspectos como a adxudicación do uso e o sistema de baixas para usuarios e clubs con impagos superiores a tres meses.
Ambos os expedientes xa pasaron por unha consulta pública previa á redacción dos borradores, e esta nova fase de audiencia é un paso máis antes da súa aprobación definitiva.
