A nova medida, que busca paliar a falta de persoal, inclúe que o tempo de traballo nas urxencias do CHUO computará o triplo nos procesos selectivos e concursos de traslados. O obxectivo é dar resposta á actual escaseza de profesionais, xa que das 50 prazas médicas existentes, só a metade están dispoñibles actualmente.
O conselleiro destacou a eficacia dunha lei similar posta en marcha en 2022 para hospitais comarcais, que permitiu cubrir máis do 98% das 521 prazas ofertadas. "Cumpriuno porque contribuíu a reforzar a estabilidade dos equipos asistenciais, reducindo a temporalidade e a rotación do persoal", sinalou Gómez Caamaño.
Gómez Caamaño tamén se referiu ao incremento de 149 prazas médicas en urxencias hospitalarias en toda Galicia dende 2024 e a melloras retributivas publicadas recentemente, que suporán unha media de 3.650 euros anuais por profesional.
Subliñou ademais a alta fidelización dos MIR na comunidade, cun 77% que deciden continuar no Servizo Galego de Saúde tras rematar a súa formación, porcentaxe que sobe ao 84% na especialidade de medicina familiar e comunitaria.
O titular de Sanidade lamentou que o Ministerio de Sanidade limitase a oferta de prazas MIR de urxencias en Galicia, cando a comunidade estaba preparada para formar un residente por área sanitaria. Contrapuxo a acción da Xunta coa "parálise" do Goberno central ante o déficit de médicos no Sistema Nacional de Saúde.
