Formoso participou na mesa redonda "Experiencias transformadoras", xunto a outros representantes locais, onde compartiu a experiencia das Pontes ante a transición enerxética e o cambio de modelo impulsado na Deputación da Coruña desde 2015.
O presidente provincial defendeu que os gobernos locais deben contar con recursos e capacidade de decisión para responder aos retos de cada territorio. A proximidade, sinalou, "permite identificar as necesidades da veciñanza, pero tamén esixe ofrecer respostas concretas e render contas de maneira directa".
Como exemplo, Formoso explicou o desafío de construír un novo futuro industrial nas Pontes, un municipio marcado pola actividade da central térmica, e defendeu unha participación activa da administración local nas novas iniciativas enerxéticas.
A xestión provincial impulsada desde 2015 busca unha Deputación máis implicada nas políticas sociais, no apoio ás persoas emprendedoras e na creación de oportunidades para a mocidade, a través de iniciativas como o Plan Único, o Plan de Emprego Local (PEL) ou o Coruña Estudio Inmersivo.
O Plan Único, segundo destacou, transformou a relación cos concellos asignando fondos por criterios obxectivos e permitindo que decidan as súas prioridades, cun investimento anual que pasou de 25 a máis de 150 millóns de euros nos 93 concellos da provincia.
No ámbito do emprego, o PEL impulsou a creación de máis de 8.000 postos de traballo e apoiou 1.800 empresas cun investimento superior aos 126 millóns de euros, ademais dunha rede de 12 espazos de coworking.
O Coruña Estudio Inmersivo, cun investimento de 11 millóns de euros, busca potenciar o sector audiovisual galego e atraer proxectos internacionais á provincia, que conta con máis de 400 empresas neste ámbito.
