Este importante encontro reunirá a adestradores, analistas, docentes, xornalistas e outros profesionais vinculados ao rendemento deportivo e á toma de decisións estratéxicas dentro do xogo. A iniciativa está impulsada por SBL Education, o Club Ourense Baloncesto e a Deputación de Ourense.

O programa combinará sesións divulgativas, formación práctica e espazos para o intercambio de coñecementos entre os asistentes. Entre os relatores confirmados atópanse figuras de renome como Pepu Hernández, Moncho Fernández, Diego Ocampo, Raquel Romo, José Ajero, Luis Aranguren, Guillermo Calvo, Marc Maset e Bruno Sassi.

Abordaranse temas clave como a orixe e o uso dos datos no baloncesto, a súa aplicación na elite e o seu papel na comunicación deportiva. Ademais, o congreso integrará o XXVI Clinic de Baloncesto da Deputación de Ourense, que clausurará as xornadas o domingo 28 de xuño no Pazo dos Deportes Paco Paz.