A formación nacionalista BNG confirmou a Luís Seara como a persoa que encabezará a súa candidatura á alcaldía de Ourense nas vindeiras eleccións municipais previstas para maio de 2027. A decisión foi tomada en asemblea local, onde Seara recibiu o apoio unánime da militancia.
Nado en Ourense en 1964 e diplomado en Maxisterio, Seara xa foi candidato en 2019, cando o BNG recuperou a súa representación na corporación municipal con dous concelleiros. Nas eleccións de 2023, o partido duplicou os seus edís ata catro, achegándose a un quinto.
O obxectivo do BNG para 2027 vai máis alá de aumentar a súa presenza no concello; a formación aspira a alcanzar a alcaldía. A militancia valorou a experiencia política de Seara, o seu coñecemento da administración local, a súa proximidade á cidadanía e o seu traballo á fronte do grupo municipal.
“"Non quero ser alcalde para ocupar unha cadeira. Quero ser o alcalde de todas e todos para recuperar Ourense, para que avance, para que funcione e, en definitiva, para que a veciñanza recupere o orgullo e a autoestima de pertencer á terceira cidade de Galiza."
Tras a súa elección, Seara expresou o seu agradecemento e orgullo pola confianza depositada polos seus compañeiros. Avanzou que xa traballa cun equipo de 13 persoas, destacando a súa preparación e compromiso coa cidade. Defendeu a necesidade dun cambio na xestión municipal e afirmou que o BNG está preparado para liderar esta transformación, buscando reverter a "dinámica nociva" actual.
