Segundo os datos remitidos por MeteoSalud e MeteoGalicia, e no ámbito do Plan de Actuacións do Goberno galego fronte aos posibles efectos das altas temperaturas, a Xunta activará mañá luns 10 o sistema de alerta por episodio de calor nas seguintes zonas isoclimáticas: Zona de interior de Pontevedra (nivel 1, amarelo) e Zona de montaña de Ourense (nivel 1, amarelo).
A partir de mañá, unha masa de aire cálida procedente do sur da península comezará a entrar en Galicia. Combinada coas altas presións e os ceos despexados, isto ocasionará un incremento das temperaturas entre o luns e o martes. A situación de calor continuará previsiblemente ata o venres, especialmente no interior da Comunidade.
A Consellería de Sanidade, xunto coas recomendacións e o Plan de Actuacións da Xunta de Galicia fronte aos posibles efectos das altas temperaturas, dispón dun mapa de riscos para a saúde. Para a súa elaboración, ten en conta os datos rexistrados por Meteogalicia (temperaturas máximas e mínimas diarias e superación de límites) e por Meteosalud (análise de series temporais de temperatura e mortalidade dos últimos 20 anos).
Os principais grupos de risco ante os efectos da calor son: persoas maiores de 65 anos e menores de 4 anos; persoas con patoloxías cardiovasculares, diabetes, enfermidade pulmonar crónica, insuficiencia renal, enfermidade de Parkinson ou Alzheimer; persoas que toman determinados fármacos; e persoas en situacións de risco como maiores que viven sós ou traballadores e deportistas que pasan moitas horas ao aire libre.
A Consellería de Sanidade lembra consellos como beber máis líquidos (auga, zumes), evitar bebidas quentes, alcohólicas ou moi azucradas, aumentar o consumo de froitas e verduras, evitar comidas copiosas, usar roupa lixeira e de cores claras, sombreiro, lentes de sol e calzado fresco.
Recoméndase tamén permanecer en espazos ventilados ou acondicionados, ventilar a vivenda nas horas de menos calor, reducir a actividade física e non deixar nenos nin anciáns no coche estacionado. En caso de esgotamento ou golpe de calor, solicítase axuda médica urxente chamando ao 061. Tamén se aconsella facer seguimento a parentes ou veciños que vivan sós.
