O Grupo Municipal do Partido Popular en Betanzos presentou unha moción para abordar na próxima sesión municipal o deficiente estado de conservación de varios espazos e instalacións públicas na parroquia de Guiliade. A portavoz popular, Ceci Vázquez, destacou que estas peticións, aínda que poidan parecer menores individualmente, afectan directamente á calidade de vida da veciñanza, especialmente da infancia.
Entre as queixas recibidas atópase a falta de conservación da parada de autobús, que require limpeza e mantemento periódico por parte do Concello. Ademais, veciños manifestaron o seu malestar pola situación dalgúns elementos da área infantil, que precisan reparación ou substitución, así como desbroces máis frecuentes na contorna.
Desde o PP tamén se sinala a crecente dificultade para que familias e nenos poidan utilizar as instalacións do pavillón polideportivo, especialmente nos días de chuvia. Instan ao goberno local a buscar a compatibilidade do seu uso cos clubs e entidades deportivas.
Finalmente, a moción tamén se fai eco da reclamación para substituír sumidoiros rotos e revisar os elementos danados na rede de saneamento e pluviais.
