As obras de renovación do parque infantil de Ponte Carreira, en Frades, xa están en marcha cun investimento superior aos 43.000 euros. O alcalde, Roberto Rey Martínez, e o concelleiro de Obras, Manuel Ferreiro Marzoa, supervisaron o progreso dos traballos, que se prevé que estean finalizados nos próximos días.
Segundo apuntou Roberto Rey, esta actuación responde a unha das demandas máis significativas da veciñanza, xa que se trata da área infantil máis grande do municipio e presentaba un notable deterioro debido ao uso continuado e ao paso do tempo. A remodelación inclúe a substitución dos xogos máis danados por outros equivalentes e a restauración daqueles que aínda están en boas condicións. Ademais, cambiarase o chan de caucho por un novo e máis seguro, e o actual valado de madeira será substituído por un sistema de módulos máis resistente e protector.
Nestes momentos, xa se retiraron os xogos deteriorados e as antigas losetas de caucho. Os traballos céntranse agora na reparación e posta a punto dos elementos que permanecerán no parque, como o tobogán con caseta de madeira e os columpios, aos que se lles substituíron e repararon pezas, ademais de reforzar as ancoraxes antes da súa pintura e verificación final de seguridade.
Nas próximas xornadas chegarán catro novos xogos infantís: un resorte individual inclusivo, un resorte múltiple de tres prazas, un balancín tipo cabalo e unha estrutura multixogo con tres torres, tobogáns, redes e barras metálicas. O concelleiro Manuel Ferreiro sinalou que a disposición destes novos elementos podería requirir un axuste na distribución actual do parque, coa previsión de que estea operativo a vindeira semana.
O novo pavimento será continuo de caucho absorbente de impacto, adaptado ás alturas de caída dos xogos e cumprindo a normativa europea, mentres que o resto da superficie será cuberta con céspede sintético. Finalmente, o valado de madeira será substituído por un cerramento modular específico para áreas de xogo infantís, garantindo a seguridade e durabilidade da instalación.
