Durante tres días, a vila converterase nun punto de encontro entre a ciencia e a cidadanía, ofrecendo coñecemento científico dunha forma próxima e participativa. As actividades terán lugar en catro locais emblemáticos de Padrón: Reina Lupa, Sociedade Cultural Padronesa (Casino), Pulpería Rial e Alfolí.

O programa inclúe charlas con marcado selo local e divulgativo. Entre elas, destacan propostas como 'Pementos… de Padrón ou de Herbón?', que abordará a orixe e características destes produtos. Tamén se analizarán os lumes forestais en Galicia coa conferencia 'Poden os incendios queimar o mar?', e contidos sanitarios e de vangarda como 'Detectives de proteínas: medicina personalizada' e 'Órganos en chips que collen na palma da túa man'.

No ámbito sociosanitario, resalta a charla 'Rehabilitación xeriátrica con realidade virtual', que mostrará como as novas tecnoloxías están a revolucionar os procesos de rehabilitación e atención ás persoas maiores. Esta actividade contará coa exemplificación do servizo de atención temperá que Agadea presta en Padrón.

A programación complétase cunha mirada social da ciencia, con propostas como 'Educación social, participación e asociacionismo' e 'O lecer como ferramenta socioeducativa'. Ademais, o Concello de Padrón impulsará unha programación paralela de obradoiros para diferentes idades, incluíndo talleres infantís como 'Un día na Terra: a incrible historia da vida' e 'A máquina perfecta: explorando o corpo humano', e un obradoiro de creación de totebags científicas para adultos, impartido por Amipa.

As actividades lúdicas incluirán unha sesión de 'Xoguemos ao Trivial', demostrando que a aprendizaxe tamén pode ser divertida. Para participar nos obradoiros será necesaria inscrición previa, agás no caso do Trivial. Desde o Concello anímase á veciñanza e aos visitantes a participar nesta iniciativa internacional que busca achegar a ciencia a todos os públicos nun ambiente próximo e aberto.