A nova infraestrutura, que supón un investimento de 10,5 millóns de euros por parte da Xunta, incrementa a capacidade de tratamento da planta nun 40%, pasando de 450 a 630 litros por segundo. Esta mellora garante o abastecemento de auga de calidade para os concellos de Padrón, Pontecesures, Dodro, Valga, Catoira, Rianxo, Boiro, A Pobra do Caramiñal e Ribeira, cun horizonte fixado no ano 2044. Ademais, a rede está preparada para dar apoio a Vilagarcía de Arousa se fose necesario.
Durante a visita ás instalacións remodeladas, acompañado pola conselleira de Medio Ambiente e Cambio Climático, Ángeles Vázquez, o presidente autonómico subliñou a importancia da colaboración supramunicipal para ofrecer un servizo esencial como é o da auga potable. "Abrir a billa parece algo moi sinxelo, pero cando non sae auga empeza a alarma, e se a que sae non a podes beber é a segunda alarma; polo tanto, temos que procurar que a haxa e que sexa de calidade", asegurou.
A actuación tamén supón un avance na protección ambiental do río Ulla e da ría de Arousa, coa incorporación dunha nova liña de tratamento de lodos e un sistema de recuperación e reutilización da auga de lavado dos filtros. O presidente invitou a reflexionar sobre o uso eficiente da auga e destacou que estas infraestruturas hidráulicas deben pensarse con visión supramunicipal, amosando o compromiso do Executivo galego para colaborar cos concellos neste obxectivo común.
Esta intervención enmárcase no espírito do Plan Estratéxico de Recursos Hídricos de Galicia (PEREGA), que busca optimizar e conectar os sistemas hidráulicos existentes, reducir perdas na rede e garantir a eficiencia no consumo.
