O Concello de Padrón foi escenario dunha das xornadas máis concorridas das festas do Santiaguiño do Monte, destacando o tradicional Gran Derbi Asnal. Nesta edición, a competición contou con xinetes procedentes de Xaén, País Vasco e Asturias, ademais dos locais.
Na modalidade de burro a pé, Caprichoso, presentado por Andrés Pérez, impúxose na proba final. Participaron 16 animais con presentadores de idades variadas. O segundo posto foi para Melendi, de Antonio Aradas, e o terceiro para Rayo MacQueen, de David Fraga.
Na categoría de xinetes montando os burros, Dinamita, de Sergio Freire, foi o máis rápido entre quince competidores. Melendi repetiu segundo posto e Caprichoso obtivo a terceira posición, tras a súa vitoria na modalidade a pé.
O alcalde, Anxo Arca, e a concelleira de Turismo, Chus Campos, foron os encargados de entregar os premios e medallas aos gañadores. A proba desenvolveuse nun ambiente familiar e festivo, cumprindo coas normas de benestar animal establecidas pola organización.
Jacobo Pérez Paz, presidente da Asociación Burro Fariñeiro, destacou que a carreira mantén viva unha tradición "moi vinculada ás festas do Santiaguiño do Monte e á nosa cultura".
Ademais do derbi, a xornada incluíu unha festa infantil no Campo do Souto con inchables e atraccións, e o festival do grupo folclórico A.C. Rosalía de Castro no adro do Convento do Carme, con música e baile tradicional galego.
A charanga Los Támega animou as rúas antes do festival Ultreia, que contou coa presenza de Mondra. A xornada pechouse coa sesión 'Love the 90's & 2000's' no Paseo do Espolón.
