A cerimonia tivo lugar nun ambiente de profunda emoción, baixo un ceo que deu unha tregua á choiva. O homenaxeado percorreu a pé o traxecto ata a Casa Mariñeira de Don Fernando, precedido polos sons tradicionais das gaitas e panderetas dos Gatiños de Portonovo.
Á súa chegada, foi recibido polo alcalde de Sanxenxo, Telmo Martín, e o concelleiro de Cultura e Eventos, Xoán Manuel Pérez Chaves, quen o acompañaron a través dun corredor de honra formado por veciños e amigos que non quixeron perderse o recoñecemento a un dos seus cidadáns máis apreciados.
“"Todo o mundo o coñece como Peche porque aquí en Portonovo son máis importantes os alcumes que os apelidos."
O club de fútbol local tamén quixo participar na homenaxe, entregándolle unha camiseta personalizada e dedicándolle unhas palabras de agradecemento polo seu incansable labor como delegado durante décadas. Tras recibir a cobizada Raia de Ouro, o propio homenaxeado tomou a palabra coa brevidade e sinxeleza que o caracterizan, logrando unha ovación unánime ao exclamar: "Grazas Portonovo por esta medalla de ouro. Ata logo".
“"Hoxe recibes o cariño e o respecto da xente que compartiu a vida contigo. Falar do meu avó é falar de compromiso, de humildade e de paixón. Detrás de cada acto hai unha persoa boa de verdade. Avó, grazas por ensinarnos o valor do traballo, do compañeirismo e de querer sempre á túa xente."
O peche institucional correu a cargo do alcalde, quen enxalzou a figura do premiado como símbolo da identidade local, lembrando que "falar de Peche é falar da esencia desta vila". O rexedor fixo fincapé en que ese "espírito colaborador e sempre disposto a mellorar Portonovo debe ser o que nos debe unir a todos".
O alcalde aproveitou o peche do evento para agradecer a implicación do sector hostaleiro nesta cuarta edición de Portonovo Gastronómico: Festa da Raia, subliñando que "a entrega da Raia de Ouro sempre será o mellor broche de ouro da cita".
