As persoas convidadas do distrito sanitario do Salnés poderán acudir, entre o 26 e o 29 de outubro, ao Hospital Público do Salnés. No distrito sanitario de Pontevedra, a recollida de mostras realizarase no Hospital Público de Montecelo, entre o 2 e o 19 de novembro.
O horario para a extracción, con cita previa, será de 15,30 a 18,30 horas. O persoal sanitario informará de todo o proceso aos participantes. Non é necesario acudir en xaxún.
Para esta nova recollida enviáronse 2.858 invitacións: 2.156 para Pontevedra e 702 para O Salnés. O obxectivo é acadar a participación de 571 persoas, 431 de Pontevedra e 140 do Salnés.
O proxecto Xenoma Galicia, cun investimento da Xunta de 20 millóns de euros, busca recompilar o ADN de 400.000 galegos para identificar xenes relacionados con cancro de mama e ovario hereditario, síndrome de Lynch e hipercolesterolemia familiar.
Ata o momento, analizáronse 3.112 mostras biolóxicas. A análise das 1.279 mostras da fase 1 atopou 25 casos positivos máis para as patoloxías cribadas: 14 en cancro de mama e ovario hereditario, 2 en síndrome de Lynch e 9 en hipercolesterolemia familiar.
En total, detectáronse 53 positivos: 19 do piloto de sangue, 9 do piloto de saliva e 25 na fase 1. Deles, 30 son de cancro de mama e ovario, 7 para o Síndrome de Lynch, 1 positivo para ambos e 15 en hipercolesterolemia familiar.
Coordinado pola Consellería de Sanidade e dirixido polos investigadores da Fundación Pública Galega de Medicina Xenómica María Brión e Ángel Carracedo, o proxecto contribuirá ao deseño de novos programas de prevención e detección temperá.
