A intervención, que se desenvolverá ao longo da próxima semana, consistirá no levantamento dunha barreira natural de area de máis de dous metros de altura. Esta estrutura situarase na zona intermedia do areal, mantendo unha separación de seguridade co respecto ao Paseo Marítimo.
A alcaldesa, Inés Rey, subliñou a importancia desta medida para a "conservación das infraestruturas municipais e a prevención dos danos que poden ocasionar os fenómenos meteorolóxicos adversos". Esta actuación forma parte dos labores habituais de mantemento e protección do litoral que leva a cabo o Concello.
Os traballos serán executados con maquinaria especializada que desprazará e acumulará a area desde a liña de beira cara á zona próxima ao muro do paseo. Posteriormente, os operarios modelarán e compactarán o sedimento para configurar unha estrutura en forma de noiro estable, capaz de absorber parte da enerxía das ondas.
Os servizos técnicos municipais realizarán un seguimento continuado do estado da duna para avaliar a súa evolución e determinar se son necesarios reforzos en función das condicións meteorolóxicas e marítimas.
Esta técnica de enxeñaría branda, utilizada desde 1995 tras un temporal que danou o antigo Paseo Marítimo, consolídase como unha medida de protección fronte aos temporais atlánticos. Permite aproveitar a area da praia para crear unha defensa temporal, sendo unha intervención reversible que compatibiliza a protección invernal co uso público estival.
A duna permanecerá instalada ata mediados de maio de 2027, cando o Concello procederá á súa retirada para recuperar a configuración habitual do areal e preparalo para o inicio da tempada de baño, prevista para o 15 de xuño. Esta intervención enmárcase nos traballos de conservación e mantemento dos espazos públicos e da fachada marítima.
